LUGARES SAGRADOS EN LA PAZ 'CHUQI YAPU MARKAN WAK’ANAKA'

CHUQI YAPU MARKAN WAK’ANAKA

Qillqiri: jilata, Edwin Usquiano Quispe

(aymar ar yatintapxañani)

‘aprendamos la lengua aymara’

Chuqi Yapu Markan kimsa tunk wak’anakaw utji. Uka wak’anakax qullunakana, qarqanakana, uma jalsunakana, ukhamaraki, kawkhanay jayar uñtañanakax utjch ujkanakanw utji. Ukampirusa, ukachiqanakax jaqinakan wali yäqatapuniwa. Kunalaykutixa, ukawjanakaruw waxt’ax luqtaña. Ukhamarakiwa, jaqinakax uka wak’anakarux  walipuniw alkulampix ch’allasipxi. Taqi ukanakaxa, askinjam taqi kunas utjañapatakiw phuqapxi.

Uka wak’anakarux pachaparjamaw kuna luqtäwinakas phuqañaraki. Jilpachaxa, llump’aqa, lakan phaxsi satarakiwa, uka pachanw luqtapxi. Luqtasaxa, taqi chuymaw yänakx jikxatapxarakispa, taqi kunas askikirakispawa. Ukataw uka wak’anakarux mayt’asipxaraki. Kunapachay uka wak’ar yäqañx qalltsna ujkatxa, sapa maraw luqtax uka wak’atakix wakiyaña. Janit ukhamasp ujkaxa, kuna chijis arkasikirakispawa.

Uka wak’anakax aknïrinakaspawa: Wak’a Jisk´a Waraquni, Wak’a Curva del Diablo, Wak’a Jach’a Apacheta, Wak’a Jach’a  Qullu, Wak’a El Calvario (Apacheta), Wak’a 27 de mayo, Wak’a Alto Pampahasi, Wak’a Apacheta Pukara, Wak’a K’ili K’ili, Wak’a Awki Qullu (Muela del Diablo), Wak’a Wallatani Qullu, Wak’a Sami Alpacoma, Wak’a Wara Warani, Wak’a Murmuntani, Wak’a Chinchaya Qullu, Wak’a Mama Lorenza, Wak’a Tata Lorenzo; ujkaruxa,  Wak’a Valle de la Luna. Taqi uka wak’anakaruw Chuqi Yapun jakasirinakax askinkañatakix wakiyapxaspa.

Mä wawak qhip nayr uñtas sartasipxañani

Jallalla qullasuy marka…

WISKHA K’ANAÑA 'Trenzado de soga con lana de llama'

WISKHA K’ANAÑA

Qillqt’iri: jilata, Edwin Usquiano Quispe

(aymar ar yatintapxañani)

‘aprendamos la lengua aymara’

Nayra pachanakanxa, achachilanakax qarwa t’arwat wiskhanak taqi kasta saminakan  k’anapxiritayna. Wiskha k’anañ qalltañatakixa, nayraqatax t’arwaw qarwanakat khuchuraña. Uka t’arwax wali askinjamaw t’isaraña. T’isaratatsti, mä jisk’a  chiqap lawaruw mismiraña. Ukatxa, mismiratatxa, uka t’arwa mismitx qantirañawa. Ukhampirusa, mismirat tukuyarux umat t’axsuqañarakiwa. T’axsuqatatsti,  pä lawa, jani ukaxa, pä ch’akur liqintatar muytayasaw lupir wañicht'añaraki. Wañt’ipansti, uka wiskha mismitxa maysarkamakiwa khiwiraña. Ukhamata, wiska k’anaña qalltañataki. Ukatx, t’arwa mismitx kimsaqallquruw jaljaña. Ukampirusa, uka whiskhan jiwakiñapatakixa, pusix yaqha samini, ukat maynïr pusisti yaqha saminiñaparakiwa. Ukhamaw wiskhax k’anaña.

Mä wawak qhip nayr uñtas sartasipxañani

Jallalla qullasuyu marka…

Palabras que inicia con /PH/ en el aymara

JUYPHI PACHAW CH'UÑUX CH'UÑUCHAÑA 'época de helada'

JUYPHI PACHAW CH'UÑUX CH'UÑUCHAÑA

Qillqt’iri: jilata, Edwin Usquiano Quispe

(aymar ar yatintapxañani)

‘aprendamos la lengua aymara’

Juyphi pacha: aka juyphi pachanx taqiniw ch’uñx chuñuchapxi, kunawsatï, llamayuñ tukuyxapxi, ch’uqs puñt puñt ajllsxapx ujkan (junio, julio) ujkaw juyphix purini, taqiniw kunayman ch’uqinaka, puñta puñta mä khuskha pampar alaqpachar uñacht’ayasinx uskupxi. Jilpachax kawknirinakatï t’una ch’uqinakäk ukwa ch’uñutakix mä pamparux uskupxi, kunawsatï juyphix wali juyphintx ukjax pä arumakiw alaqpacharux uñacht’ayapxi, maysatuqitx, kunawsatï jani wali juyphix juphintx ukjax kimsarmarakiw alaqpacharux uñacht’ayapxi.

Ukjarux, uka t’una ch’uqix ch’uñüx ukjaw wali lupin quntuchthapt’asïn qunt qunt takirapxi, uka ch’uñx mayap juyphimpix ukärmax juphimp thuqtayapxi, qhipürux ch’uñanutx mayat mayatrakw sillp’irxapxi, payur wañt’ayasinx uka ch’uñux wañakixiwa, kunawsatï thayax purinx ukjax uka ch’uñx wali k’achhata jani t’unarasiñapatakix khuytxapxi, ukat kustalanakar irtxasinx manq’añtaki, chikatanakx aljañatakirak apkatxapxi.

Chikat ch’uqinakx yaqhipanakax tuntatakirakiw ch’uñjasinx umar apantanxapxi. tuntax wali suma janq’ukipañatakikix, uka umax jalaskir umañapawa, yaqhiptuqinakanx tuntx wali uqikw umatx apsusipxi, kunalaykutixa, janiw jalir umar tuntapkiti, jani ukasti mä uma phujurukiw ch’uñx tuntaptañapakak wayuntanipxi.

Ch’uñux tuntaptañapatakixa, munasiwa kimsa simana, yaqhipanakax wali p’uxsa ch’uqit tuntantaniñatak apapxi, ukanakax pä siman chikanikirakiw umankt’ayapxi, ukat apsxapxakirakiw umatxa. Umat apsusinsti, mayamp suma ch’iji pamparux alaxpachar uñacht’ayañatakix uskupxi, mayamp juyphimp thuqtayañataki, ukxa uskupxiwa tuntax wali sumañapataki, janitï ukjam lurap´kaspaxa ch’uñux murayjamakispawa.

Kunawsatïx juyphimp thuqtayatäx ukjaxa, ch’uñu kipkakw sillp’inakapx sillp’irxapxaraki, ukat wañt’ayasinx kunawsatix thayax thayt’ank ukjaw jani usucht’asa, jani t’unarasa t’unarañatak khuytxapxi, ukat mä suma kutalaruw sum ch’iphantas pirw pirw arkt’axpxi.

Ukham arkt’asïnx ch’uñs tuntsa, kunawsatï jani qullqinixapx ukjaw aljañatakix qhatunakar apxapxi, chikatx manq’añatakirakiw apkatasipxi, yaqhipanakax mach’amaratakirakiw janïr ukjat sixirux imt’asxapxi, jani ukasti, pirw pirw imasipxi.

Mä wawak qhip nayr uñtas sartasipxañani

Jallalla qullasuyu marka…

Chapar Aru 'poesia en aymara' "mamita mamita"

Chapar aru 

“MAMITA MAMITA”

 (Qillqt’iri: Edwin Usquiano Quispe)

Mamita jumax wali jiwitakitawa
khä panqaranakjamaw ajanumax
khä illimanjamaw k’ajtani
amuyumax wali jach’awa.

Nayat amtasista mamita
wijllta jayp’u sujst’asa
nayar munasista
jach’a munasiñan tayka.

Nayan wali munat taykaja
jumakiw nayan t’aqhisitaxs yattaxa
jumakiw nayan manq’ataxs yattaxa
sapurus juma jak’ankañakw muntxa.

Jumax nayatakix wali jach’atawa
jumaw ch’amamamp aka pachar apanista
suma willka qhan uñjayista
kunampirak kutt’aykam mamita.

Jumax mamita jak’ajankasktawa
jumax arux k’ajtaytaxa
janit jumakasm ukjaxa
janiw kunas chiqapar sartkaspati.

Kawksarus jichhax mamit saraskta
aksar kutt’anim jutam
chhuy…!!! Ist’itay mamita
nayax jumachikaw saran munta.

Mamita kunas kamachasktama
kunats llakit uñanaqasta mamita…!!!
ist’itaya ñanqha jaqinakach uñistam.

Janiw ukax askikaspati
chhuy…!!! jan yäqamti
Jumax qamasamp makhatam
jani ch’am pist’ayasimti.

 Mamita… mamita…
nayax jumarux wali munasma mamita…!!!

Jallalla taqi taykanaka...

SIWSÄWI 'cuento en aymara' ACHAKUN SARNAQÄWIPA 'la vida de un ratón'

ACHAKUN SARNAQÄWIPA
'la vida de un ratón'

 Qillqt’iri: jilata, Edwin Usquiano Quispe

(aymar ar yatintapxañani)

‘aprendamos la lengua aymara’

Mä urusti mä achakuw mä utan sarnaqaskatayna. Sutipasti Octavio satanawa. Uka achakusti, uka utanx mä p’iyanw sapür qamasïna. Ukampirusa, uka utan jaqipax mä phisi uywasinxatayna. Uka phisix wali jacha phisinawa. Ukampirusa, jaqipax trampanak achak katuñatakix uskuntarakitayna. Ukatwa, uka wali ch’ikhi achakux yaqhachiqana sarnaqatayna. Ukachiqanakanx millk’itikanakw lunthataskatayna. Ukatxa, mä urux phayasi utaru mantaskakinawa. Mantasinxa, katri manqhanakur jank’akiw lluskhuntiri. Mä urusti achukuxa ma phuku itsuña yant’xatayna. Uka phukux mantikanitaynawa. Ukampirusa, uka mantikax wali junt’utaynawa. Ukhamat jakañ apt’asiwayatayna.

Mä wawak qhip nayr uñtas sartasipxañani

Jallalla qullasuyu marka…

PRAGMÁTICA Y GRAMÁTICA

PANORAMA DEL TRATAMIENTO DIDÁCTICO DE LACORTESÍA VERBAL

Cortesia (9) - Jose Tesis - Open Office by Maja Moya Aprila

CONJUGACIÓN DE LA LENGUA ESPAÑOLA

larousse comunicacion conjugación verbal by APOCALIPSIS

LA CORTESÍA VERBAL

H Haverkate La Cortesia Verbal by Maja Milanovic